Another Mortal Life

"Bas badhiya!"

February 1, 2016

Kal subah 10 bje...
Haan, kahaan chhoda tha isko mene,
Office ki punching machine par
Ungli rakhne ke sath sath..

Itni uljhi hui kavita
Is se pehle kabhi likhi nhi mene;
Khair, likhi to abhi ye bhi nhi.

Shuruaat yad hai mujhe iski..
Badi traditional thi..
Rhyme bhi thi isme..

1 mahine pehle
jab pehli bar
Iske bol meri juban pe aaye the
Ecstacy kahein Anand kahein
Un bolo ka asar
Mere chehre per bhi aaya hoga...

Kyuki tabhi to..
saamne se aate vo janaab bol pde the,
"Road me right left...
kuchh hota hai ki nhi?"

Vo to chalte bane lekin
Ye kavita vahin uljh gyi.

Suljhane lage ki waqt ka dhyan aaya
10 bajne ko the..
kavita ko agle din ke liye taal
Humne office pahuchna sahi samjha.

Lekin tab se roj
9.30 se 10 ke beech
ek - do - 4 - 5 minute
Ye kavita zehan me
Kaundhti zarur hai..

Aaj ikkatisve din..
Bol pehle din wale nhi hain
Dusre din wale bhi nhi..
10ve, 11ve, 20ve din wale bhi nhi
Kal wale bhi nhi

Lekin kavita to ye vohi hai..
Vohi ek hi hai..
Jo is bhagte daudte shehr se..
31 din tak
Kabhi ek to kabhi do
To kabhi 5 minute churakar mene
Abhi aadhi adhuri si likhi hai.

Ya kahun ki mene apne hi ye
ek, do, 5 minute bachaye hain
"Aur vikram, punch kr diya"
"Haan"
"10 baj gye?"
"Haan"
"Kya haal chaal hai?"
"Bas badhiya!"

Posted by .. Vik . at 3:11 AM

5 comments

October 18, 2015

Aaine ab bahut
dhundhle ho chale hain
Apni pehchan se sabhi
Alhada ho chale hain

Vo dhoop jo band khidki par
Karti thi intezaar mera,
Arsa hua us se hum
Beparda ho chale hain.

Vo shaam jiska vaasta
Zara nhi tha humse,
Hum kyu usi ki bisaat ke
Mohre ho chale hain.

Vo bayaar jo pehle kabhi
Bujha jati thi aag ko,
Buut-e-mom usi me jalkar
Ab Khuda ho chale hain.

Posted by .. Vik . at 3:22 AM

2 comments

October 11, 2015

In panno ko palaTte palaTte aaj,
Jaane kitne lamhe zinda ho aaye hain

Kuchh lamhe ese bhi, jo maine lafzo me kabhi ukere hi nhi

Shayad lafz chahe se zyada hi samet liya krte hain.

Posted by .. Vik . at 9:56 PM

0 comments

February 24, 2015

Na tha kuchh to vo tha, kuchh naa hota to vo hota,
Dubayaa sabko uske hone ne, na hota vo toh kya hota ?

.....Ghalib.

Waise, thoda bahut alag ho skta hai. Power wale chasme se yehi padhne me aaya. :)

Posted by .. Vik . at 11:40 PM

1 comments

Baat

September 11, 2011

Baat mere sawaal ki hai, ya,
Baat tere agar magar ki hai..

Kuchh mere dhadkte dil ki hai,
Kuchh teri jhuki nazar ki hai..

Mehsoos ki hai jo maine, keh de,
Toone bhi agar ki hai..

Baat teri meri na hokar
Kyun bas jamaane bhar ki hai..

Guzar to jaayegi yoon bhi
Baat to rehguzar ki hai..

...

Baat to asar ki thi
-Kuchh to asar ki hai..

Posted by .. Vik . at 11:21 PM

6 comments

Ajnabi ban jaayein...

September 1, 2011

Ik waqt tha, jab baatein bahut thii karne ko,
Par baaton ke liye hamaare paas waqt na tha..
Mohabbat, arsa intezaar me rahi, bayaan hone ko,
arsa-dar-arsa, magar, uska wuzood hi na raha.

Mit chuki hai zehan se ab, yah,
ik arsa ho chala,
Is qadar bin-aawaaz toota ye rishta
pata bhi na chala.

Zindagi ke jhamelo mein
yoon zindagi chali gayi,
Sab kuchh to hai paas hamaare
khud ka par pata nahii.

Aaj waqt bahut hai paas magar
kahne ko kuchh paas nahii,
Chalte to hain saath aaj
hain magar hum saath nahii.

Bahut unchi ho chali hain diwaarein hamaare beech,
Par zindagi to, zaroor, aage badhti jaani hai.
to aaj se, priye, aur aage se,
tere mere sukh dukh ki ab alag alag kahani hai.

Chalo chhod dein khud ko zindagi ke bahaav par
le jaati hai kahaan ye humein dekhein zara
Aur haan,
apna khyal rakhna zara.

--- An unauthorized translation attempt. Hope the poet, who happens to be still alive, doesn't sue me...